ឯកឧត្តម ង៉ែត វិបុល អគ្គនាយកដ្ឋានឧស្សាហកម្ម និង លោក ផែ ច័ន្ទត្រាវឌ្ឍ ប្រធាននាយកដ្ឋានកម្មសិទ្ធិឧស្សាហកម្មបានអញ្ជើញទៅចូលរួមកិច្ចប្រជុំក្រុមការងារកិច្ចសហប្រតិបត្តិការកម្មសិទ្ធិបញ្ញាអាស៊ានលើកទី៧២ “72nd ASEAN Working Group on Intellectual Property Cooperation (AWGIPC)” ដែលប្រព្រឹត្តទៅចាប់ពីថ្ងៃទី២២ ដល់ថ្ងៃទី២៦ ខែមេសា ឆ្នាំ២០២៤ នៅដាណាំង ប្រទេសវៀតណាម
គោលបំណងនៃកិច្ចប្រជុំនេះផ្តោតទៅចំនុចសំខាន់ៗរួមមានដូចជា៖
១). ធ្វើបច្ចុប្បន្នភាពកិច្ចសហប្រតិបត្តិលើផែនការសកម្មភាពការងារ និងបន្តអនុវត្តន៍ផែនការសកម្មភាពការងារបន្ទាប់
២). លើកកម្ពស់ចំណេះដឹងសាធារណៈពាក់ព័ន្ធកម្មសិទ្ធិបញ្ញា ការអភិវឌ្ឍធនធានមនុស្ស ហេដ្ឋារចនាសម្ព័ន្ធ ឌីជីថល បច្ចេកវិទ្យា និងនវានុវត្តន៍ ដល់វិស័យសាធារណៈ និងឯកជន សហគ្រាសធុនតូច និងមធ្យម។ល។ និងសកម្មភាពផ្សព្វផ្សាយចំណេះដឹងសាធារណៈផ្នែកកម្មសិទ្ធិបញ្ញាផ្សេងៗតាមរយៈ ការបណ្តុះបណ្តាល សិក្ខាសាលា កិច្ចប្រជុំផ្លាស់ប្តូរមតិ ចែករំលែកបទពិសោធន៍ ការផ្តល់បដិសណ្ឋារកិច្ចចំពោះទស្សនកិច្ចផ្លូវការ និងព្រឹត្តការណ៍ផ្សេងៗ
៣). អភិវឌ្ឍន៍វិស័យកម្មសិទ្ធិបញ្ញាតាមរយៈជំនួយបច្ចេកទេសដៃគូអភិវឌ្ឍន៍នានា ដើម្បីធ្វើឱ្យប្រសើរឡើងបន្ថែមទៀតនូវកំណើនសេដ្ឋកិច្ចអាស៊ាន
៤). ការផ្តល់ជំនួយផ្នែកបច្ចេកទេសក្នុងវិស័យកម្មសិទ្ធិបញ្ញា និង
៥). ពិនិត្យផែនការសកម្មភាព និងគាំទ្រដល់ដៃគូអភិវឌ្ឍន៍នានាដូចជា៖ WIPO, EPO, EUIPO, JPO, AANZFTA IP Committee (IPC) & International Olympic Committee (IOC) ដើម្បីបន្តអនុវត្តផែនការការងារសម្រេចឱ្យបានតាមផែនការសកម្មភាពការងារ ឆ្នាំ២០១៦-២០២៥ នៃក្រុមការងារកម្មសិទ្ធិបញ្ញាអាស៊ាន។
